Akala mo “anghel” ‘yon pala ay ‘lobo’

Bago lumutang ang isyu kung ‘na-coma o nasa kama’ lamang si PDU30 nitong nakaraang ‘weekend,’ naging abala naman ang mga ambisyosong-pulitiko na pumosisyon para sa ‘2019 mid term elections.

Lahat nagtutungo ngayon sa Davao City para makipagalyado sa Hugpong ng Pagbabago (HNP) ni Mayor Sarah Duterte. Bagama’t ang HNP ay isa lamang ‘regional party’ ayon sa mga ‘founder’ nito, ang mga ‘national party’ ay tiklop-tuhod na yumukod sa HNP, para sa ‘pagbabago at serbisyo-publiko.’

Lokohin ‘nyo ang lelong ‘nyo.

Ang PDP-Laban, na gustong saniban ng lahat ng mga ambisyosong-pulitiko dahil ito ang partido nagdala kay PDU30 noong 2016 elections ay hindi pa kasama sa HNP. Bago daw makasama sa HNP, resolbahin muna ang paksiyon sa loob ng partido.

0000

Hanggang ngayon namamayagpag pa rin ang ‘traditional politics’ sa bansa. Ang kapangyarihang-pulitikal, nanatili pa rin sa iilang pamilya. At dahil kontrolado ng mga ‘political family’ ang gobyerno, normal lamang, na sila rin ang may kontrol sa negosyo at takbo ng pamumuhay ng mga tao.

Ang mga pulitikong-balimbing ay nakasusulasok tulad ng pestisidyo. Peste sa lipunan at pasakit sa mga tao. Ang ambisyosong-pulitiko, dahil maraming pera, kahit ‘halimaw at kurakot,’ nagmumukhang angel ngunit isa pa lang lobo.

Ang bagsik ng kanilang lason. Anong lupit kung makapangunyapit sa pwesto, isasangla ang kaluluwa at puso, makuha lang ang gusto.

0000

Ang mga ‘hunyango’  sa lahat ng panahon ay aktibo. Walang ‘loyalty,’ amo ang lahat, basta kikita ng paldo.

Sa Kongreso nakasalang ngayon ang taunang pondo ng gobyerno. Bago himayin ang mahigit sa P3-Trilyong piso na pambansang pondo, nagtalo muna ang mga ‘henyo.’ ‘Cash-based ba o obligated’ ang magiging sistema sa pagpapakawala ng pera ng mga tao?

Gusto ng Malacanang ‘cash-based,’ sa bawa’t proyekto, ang mga ‘henyo’ sa Kamara ‘obligated’ ang gusto. Dahil magkasalungat at maho-hostage ang proyekto at serbisyo na kailangan ng mga tao, nagkasundo ang Palasyo at Kongreso na ‘hybrid system’ na lang ang pagpapalabas ng pondo.

Ang pera ng bayan, pinakikialaman ng mga ambisyoso at hungyangong pulitiko. Kaya’t hindi nakapagtataka, maraming proyekto lalo na sa malalayong bayan ang hindi makumpleto dahil sina Governor, Vice Governor Congressman, Mayor, Vicer Mayor, Board Member, Councillor, Chairman at si Kagawad ay kumurot sa proyekto.

24 August 2018