Baril mula sa Rusya

Sa pagharap ni Pangulong Duterte sa mga sundalo sa Tarlac, kamakailan hindi na napigil ang sarili at inanunsiyo sa publiko na ang Moscow ay magbibigay ng limang libong Kalashnikov Assault Rifle o AK 47, milyong rounds ng mga bala at mga truck.

Agad akong nakipag-ugnayan sa ilan nating kaibigan sa Russian Embassy sa Makati at kinumpirma naman ng ating “tovarish’ o kaibigan na may tulong- militar nga mula sa Kremlin.

Ang mga ‘Russian military hardware’ ay inaasahang darating dalawang lingo mula ngayon.

Ang malalaking barkong Ruso ay maaring dumaong sa Subic o Port of Manila bago matapos ang buwan ng Oktubre o sa unang bahagi ng Nobyembre.

0000

Ngayong malaya na ang Marawi sa bangis ng teroristang Maute, batay sa pahayag ni PDU30, sino kaya ang masasampulan ng AK 47 galing sa mga Ruso?

Kung susundan ang mga deklarasyon ng Pangulo, namumuro ang mga rebeldeng komunista.

Ang kasaysayan nga naman, may isang panahon, ang AK 47 ay gamit ng mga rebeldeng komunista laban sa pwersa ng gobyerno.

Ang Kremlin din ang nagbigay.  Subali’t ito ay sa panahon na ang Russia ay Unyong Sobyet pa.  Na ang mga nakatira pa sa Kremlin ay mga miyembro ng Politburo ng Partido Komunista ng Union of Soviets Socialists Republic o USSR.

0000

 Ang military truck na binabanggit ni PDU30 ay ang “Ural truck.” “All purpose-All Terrain “ ang “Ural”. Katulad ito ng ng ‘6 by 6 truck’ na gamit ngayon Armed Forces of the Philippines, malalaki lang ang gulong ng Ural truck.

Ang “ural” ay salitang Ruso na ang ibig sabihin ay ‘bundok’ o mountain.

Ang “Ural’ ay isang mountain range sa Russia. Isang ‘natural boundary’ sa pagitan ng Yuropa at Asya.

Ang Pilipinas ay maraming bundok at maraming lubak-lubak na daan. Masusubok dito ang kakayahan ng mga truck galing Rusya.

0000

Nataon na ang pagdating ng mga ‘Russian military hardware’ ay ilang araw bago isagawa ang East Asian Summit sa Clark Air Base at Metro Manila. Hindi nga lamang magkakadaupang palad sina PDu30 at Russian President Vladimir Putin.

Hindi makakarating si Putin dahil dadalo ito sa Apec Summit sa Vietnam.

Si Russian Prime Minister Dmitry Medvedev ang kakatawan kay Putin.

Maging si Chinese President Xi Jinping ay malabo na ring makadalo batay sa mga paunang impormasyon.  Si Chinese Prime Minister Li Keqiang ang kakatawan kay Xi Jingping.

Kumpirmado naman darating si US President Donald Trump.

0000