May chapa na , may baril pa

Tama lang ang desisyon ni PNP Chief Director General Ronald Dela Rosa na i-recall ang mga pulis na itinalaga sa mga ‘Very Important Persons’ o VIP.

Ayon sa Police Security and Protection Group ng PNP, 700 mga pulis ang nagse-secure sa may 300 mga kawani ng gobyerno at 400 mga sibilyan.

Imbis na magpatrol sa kalsada, para maseguro na ligtas sa mga kriminal ang mga mamamyan, ang 700 pulis na ito ay nagsisilbi at nagpapa-alila sa mga ‘very important person.’

Bakit kailangang mga pulis - na ang sweldo ay galing sa pera ng bayan-  ang magbibigay ng proteksiyon sa mga taong ito?

Di ba may pera naman ang mga “VIP” na ito, bakit hindi nila kunin ang serbisyo ng mga ‘private security agency’ - na pag-aari naman ng mga retiradong heneral na pulis at militar- para mag secure sa kanila?

0000

Sa kulturang Pinoy, iba ang dating kung may ‘badigard’ ka, lalo na kung pulis.

Ang pulis ay may “chapa.”  Ang ‘chapa’ ay simbolo ng otoridad, nirerespeto ng lahat.

Komportable ang mga pulitiko at mga ‘high profile personality’ na kunin ang sersbisyo ng mga pulis at iba pang law enforcer, kasi nga, may baril na, may ‘chapa’ pa.

                                                0000

Hindi sana nagulo ang tabakuan, kaya lang sa isang reyd na isinagawa ng PDEA, nadiskubre na dalawang pulis ang nagbibigay ng proteksiyon sa anak ng isang nakakulong na Chinese drug lord.

Dapat lang tuldukan ang paggamit sa mga pulis bilang badigard ng mga VIP.

Silipin na rin ang mga sundalo at ahente ng NBI na katulad ng mga pulis ay nagiging badigard din.

0000

Malupit talaga ang mga ‘smuggler.’

Kahit matindi ang kampanya ng Administrasyong Duterte laban sa ‘smuggling,’ pilit pa ring lumulusot ang mga sindikato.

Nakadalawang Commissioner na si PDu30 pero ang makinarya ng mga kawatan ay matatag pa rin, hindi mabuwag-buwag.

Konektado pa rin kaya?

Published: 10 November 2017