Ang lawa ng aking pagkabata
Inamin ng Laguna Lake
Development Authority (LLDA) na naapektuhan ang kampanya ng administrasyong
Duterte laban sa iligal na baklad o fishpen sa lawa ng Laguna. Utos ng korte ang
dahilan.Sino ba ang gustong sumuway sa kautusan ng Korte? Sino ba ang gustong
ma-contempt? Nakalulungkot, ang pagbubunyi ng mga maliit na mangingisda
ay pansamantala lang pala.
***
Ang matulaing
Lawa ng Laguna ay naglilitanya na ng mga hinaing. Ang pagkalason ng lawa ay
una sa lahat. Ngayon ang mga nahuhuling biya, ayungin, kanduli at tulya
ay hindi na kasing
dami tulad noong ako’y
bata pa. Ang lawa ng aking
pagkabata ay sinakop na ng mga naglalakihang baklad. Itinaboy ng mga baklad na
ito ang mga maliit na mangingisda na dati’y halos mapuno ang kanilang maliit na
bangka sa mga nahuling isda sa lawa ng aking pagkabata.
***
Ang mga
basurang-industriyal mula sa mga pabrika na nasa paligid ay isa rin sa
pangunahing dahilan ng pagkasira ng lawa. Ang mga tinawag na chemical residue
at mga nakalalasong elemento ay walang kasiguraduhan na hindi bumabagsak sa lawa ng Laguna. Ano ang dahilan, bakit bumababa ang ‘oxygen
level’ sa lawa ng Laguna?
Ang mga pamayanan sa
paligid ng lawa ay dapat ring magkusa para ‘makahinga’ ang lawa.
Ang hindi tamang
pagtatapon ng ‘domestic waste’ ay itigil na.
Ang katuwirang kaunti lang
naman ang basurang naitatapon ng komunidad sa lawa kumpara sa mga galing sa
pabrika ay hindi tama.
‘Saturated’ na ang lawa.
Ang mga duming naipon ay sobra na.
Huwag na nating
hintayin na iluwa ito ng lawa, baka marami ang madisgrasya.
***
Pagpahingahin ang Laguna
De Bay. Baklasin ang mga baklad lalo na
ang mga iligal.
Ang lawa ng aking
pagkabata ay para sa lahat hindi para sa iilan lamang. Sa mga may-ari ng mga
baklad hindi pa ba niyo nababawi ang inyong puhunan? Dekada na kayong
kumita, kung hindi
man ay nagpasasa, bigyan niyo naman ng pagkakataong makahinga ang lawa ng aking pagkabata.
-30-
Comments